Ogne vvota ca tuorne

Ogne vvota ca tuorne

se fa sempe cchiù grossa

‘a speranza ca rieste.

Vulesse na vota fà festa

stanno nziemo cu te

e tenerte int’’e braccia

astrinto,  cchiù astrinto

fino a farte sentì

chistu core ca sbatte,

comme sbatte pe tte.

Ma ogne vvota ca tuorne

nun tiene maie ‘o riesto

‘a dà a chi chiamma

e riparte e io resto

senz'arte e ne parte

e senza capì pecchè aspetto

e chi aspetto.

Si me vene nu male

a chi chiammo ?

Si me trovo ‘int’’o fuoco

che faccio?

Sta faccia

s’appiccia sulamente

‘o penziero

c''a voce ca sento  

'e chiamma a luntano.

pare ‘a toia,

ma po’ quanno ‘o cielo se schiara

e ‘a voce ca passa

se perde dint’’e ciardine

d’’e strade vicine

me vene nu male

ca esco a 'mpazzì.

Si sta vote rituorne

te vengo a piglià

fino ‘o puorto,

fino abbasci’’a marina.

Che me ne mporta

si parleno ‘e me

ca te voglio e te vaso

pecchè ncapo te trase

ch’è tiempo ‘e restà ?

Gioacchino Ruocco

Ostia Lido   10/08/2014