Primma c’’o sole…

Primma c’’o sole se ne scenne a mmare

e pare na lampara pe na varca

cunteme nu cunto che m’addorme

doce, duciazzo ma cu tenerezza

ca quanno po’ vaco a tirà ‘a rezza

ce trova dinto nu tesoro grande

ca un aggio visto maje in vita mia,

stanno ‘ncampagna o a pazzià p’’a via

cu ll’ati muccusielle comme a me.

Parlemo ‘e nu rre ca vence sempe

e leva ‘a miezo tutt’’e malamente

comme a Rinaldo ‘o paladino ‘e Francia.

E già ca io susenneme matino

me more ‘e famma fino a miezo juorno

quanno nu cuzzetiello cu ‘e fasule

cannelline mammeme me mette

mmane chino chino damme nu poco

‘e gioia e duje o tre mandarine.

‘O stommeco pe quanto è piccirillo

nun s’accuntenta sulo ‘e nu carrillo

cu na manandele pe pazzià ‘e nucelle.

Vedennete passà accussì bella

vulesse vencere sule p’’e ddà a te

comme me dice ‘o core e ‘a cerevella.

Ma passarrà ancora tantu tiempo

pe mettere na barca mmiez’’o mare

e vuttà all’aria tutto stu pagliaro

addò sto pazzianno ‘a che so’ nato

addò m’addormo ‘e vvote mmiez’’e serpe

ca strisceno senza farme male.

Che cunto sarrà ‘o mio e chi ‘o ssape

si ‘a porta nun s’arape dint’’o cielo

addò n’angelo comme a te cu ll’uocchie

nire me sta aspettanno comme fosse rre.

Quanta suspire ca me faccio ‘e vvote

quanta penziere scarte e metto a pparte.

e dint’’e surche rane a centenare

me contano ca una ch’è ‘a cchiù bella

sarrà ‘a principessa ‘e sta campagna.

c’’o princepe sarrà nu guagliuciello

cu ll’anema nnucente comme a mia.

Ma po cagna ‘a jurnata, ‘o male tiempo

ce fa nu brutto juoco e chi ha jucato

nun piglia manco n’ambo ‘e ‘afficiata.

Ll’aria ca se fa nera è rinfrescata.

Me vene ‘o triemmo ncuollo e sento friddo.

Quanno me sceto tengo a freva a mille.

Mamma me passa ‘a mano ‘int’’e capille,

m’asciutt’a fronte ma nun me sta a sentì.

Chello ca dico m’’o credo sultant’io.

A chi ‘a conto conto me guardene

straniate. ‘A freve m’è passata

e attuorno a me nun ce sta cchiù nisciuno,

ma chi me fa carizze pare na fata.

Gioacchino Ruocco

Ostia Lido                 2015/10/12

Inserita nella raccolta ”Ogni juorno è nu mese…”