Vaco perdenno tiempo

Vaco perdenno tiempo

Vaco perdenno tiempo

pe campà almeno ancora

n’atu quarto d’ora.

Attuorno sulo chiacchiere..

‘E fatte stanno a zero

e ‘o monaco carrea

tutt’’o munastero.

E’ overo, nun è overo,

ma quanno cagna ‘a museca

‘a vita è nu mistero

e ‘o moneco se porta

chello ca trova attuorno

senza se piglià scuorno

d’’e ccose ca se piglia.

Stongo perdenno tiempo

ma senza cchiù n'ammore

‘o male ‘e core è na malatia.

Che bella fetenzia

ch’’è chesta vita

ca gira ma nun gira,

pecchè… pecche è nu chiuovo.

Nu chiuvo ‘e Giesù Cristo

rimasto dint’’e ccarne

ancora a perde' sangue.

Ogge ‘o sparagno

è sulo fetenzia

nun è chiù comme a primma

ch’era ‘e siconda.

Io votto a perde tiempo

ma isso passa ‘o stesso

songo io a farme fesso,

screvenno, liggenno,

murenno chianu chiano

ma si me pigli’ ‘a mano

ve faccio nu saluto

pe quanno ‘un tengo ‘e fforze,

ma po’ cu ‘a capa tosta

me sforzo vaco ‘nnanze

chistu dulore ‘e panza

pure m’adda passà

si no m’’o ncarto e ‘o porto

a Chillo ‘e ll’Aldilà.

Gioacchino Ruocco

29.12.018   Ostia Lido

_{Dalla raccolta “Dimane è n’atu juorno”}