E comme ‘o può sapè....

E comme ‘o può sapè....

T’aggio vuluto bbene

e ‘n  ‘a capito,

e te ne voglio ancora

e nun ‘o saie.

E comme ‘o può sapè

si nun t’’o dico ?

Tutt’’a furuna mia

ca te so’ pate

è che t’aggio crisciuta,

‘mpuveriata

e tutt’’o riesto

che t’’o ddico a fa.

Si tu nun l’è capito

o t’ha scurdato

meglio pe tè

ca nun tiene pate

c’almeno

quanno ‘e feste cummannate

nun t’è sprecà

pe me venì a truvà.

Io stongo bbuono

te l’assicuro,

nun te disturbà.

Tiene nu pate ‘e fierro,

na carogna

ca te vò bbene

si nun l’è maie capito.

Uno che mangia vrito

e se ne fotte

‘e tutte quante ll’ate.

Si passe qualcheduno

pe na ‘mmasciata,

nun so parole mie

se l’è ‘mmentate.

‘E figlie ‘o ssaie

ca so’ piezze ‘e core.

Ringrazio Ddio

‘e comme m’ha criato.

‘O riesto nun è riesto

ca si faccio ‘o cunto

‘e chello c’aggio avuto

e c’aggio dato

me trovo ‘e mmane chiene

e ‘o core svacantato.

A ‘mmore va e torna

e ‘o tuoio m’è turnato

quanno stive luntano.

Si ‘o mio nun l’haie assapurato

te pozzo capità

qualche ghiurnata

ca io esisto ancora

pe ce guardà

cu ll’uocchie dint’a ll’uocchie

comme a dduie ‘nnammurate.

Gioacchino Ruocco

Ostia Lido 22.04.019