Acchiappa p’acchiappà

Acchiappa p’acchiappà,

ma po’ sta attiento

ca nun te fuje ancora

‘a dint’’e mmane.

Dimane, si succere,

acchiappa pure

si songo mazzate

ca pure ‘a lloro

tu te può ‘mbarà

qualcosa ca t’aiuta

po a campà

na vita nova

addò t’accuorge ‘e ll’ate

ogne mumento

e no sultanto

si ‘o tiempo chiove

passere e fiche secche.

‘O juorno ca t’agguazza

quatt’ove ‘nt’’o piatto

e a 'ddore ‘e fritto

arriva fino a fore

tienete sempe ‘o core

appriparate

pe qualcun’ato

ca se more ‘e famma

e addore ‘o fieto

‘e miccio da frittata

cu ‘ a famma  ca se trova

‘a quanno è nato ‘ncuollo

sempe cchiù muollo

senza osse ‘ncuorpo

e se mantena allerta

sulo pe scummessa,

pe fa rispietto a chi

ne tene sempe e ‘o ghietta.

Acchiappa p’acchiappa

ma no pe fa dispietto

ma sulo p’’a jurnata

o p’astipà  qualcosa

pe dimana, si tiene ‘a fa.

Sulo ‘a furmica

‘o fa pe tutto vierno

pecchè ‘n è fatta

pe campà ‘o friddo

‘o quanno chiove tanto.

Dimane se ne trova ancora,

basteno duje passe

e puorte ‘a casa

rrobba ca nun ce trase

ca jette pure tu.

Gioacchino Ruocco

Ostia Lido    31.08.017

Raccolta:

Dimane ne parlammo