Te veco comme a n’ombra ca va attuorno

Te veco comme a n’ombra ca va attuorno

chiedenno l’elemosina a chi trova

‘ncopp’a via soia pe nu surriso.

Na vita ‘e noia ‘a ca è rimasta sola.

Manco ‘o cafè cchiù se fa ‘a matina.

‘E vvota ‘a vaco appriesso, ma ‘n ‘a trovo.

‘A perdo ogni tanto quann’’o sole

procura attuorno a essa n’ammuina

c’’a fanno tutte chille c''a canoscene.

Chi ‘a chiamma zia e chi signora mia,

chi ‘a fa qualche carezza e chi le piglia

‘a mano e ‘ncopp’a capa ‘a porta

pe na benerezione ca le chiede.

L’uocchie le rideno comme a na santa

e chi a nnanza a essa s’addenocchia

le vasa ‘a mamma e ‘a chiamma: - Mamma bella!

Quann’ero piccerella me dive

‘o latte dint’a na buttigliella,

o s’’a purtava ‘o pietto quanno disperata

chiagneva c’’o vico sano attuorno a essa

c'a uno a una e s’’a pigliava ìmbraccio.

Che bella faccia tene sta signora!

Me pare mamma ca mò sta ‘mparaviso

ormaie so tant’anne ca ‘n ‘a veco.

L’atriere Rafiluccio ‘o carrettiere

m’ha ditto ca cu essa ce ha parlato

proprio all’angulo d’’o vico

addò pur’io ormaie me so’ appustato.

Me guardo attuorno ma ‘un veco n’anema

e aspetto. Forse nun è chisto ‘o juorno.

O forse tene tant’ata cose ‘a fà.

Stennere ‘e panne d’’a culata fatta,

forse dà ‘o latte a chi mò sta chiagnenno

dint’a nu spurtone abbandunata

mentre ‘a cielo ‘a mamma st’arrivanno.

Meglio lassà fa Ddio e a chi ‘o pretenno.

Gioacchino Ruocco*
* Biografia in Pagine

Ostia Lido               27.05.2019