N’affacciata ‘e fenesta

Che me resta d’’a vita

si è n’affacciata ‘e fenesta?

Forse ‘a festa

c’ogne tanto me faje

pe nu ma, pe nu si, pe nu forse

p’’e ccorze che me faje fà

si bbone nun staje ?

Chi m’appassa nun tene cchiù sciato,

chi s’ammoscia nun tene cchiù voglia

mentr’io m’’a sbroglio e m’a mbroglio

‘a matassa e te stongo vicino, c’arrassa

ce so’ stato quann’ero guaglione,

quanno ‘o tiempo sembrava cchiù assaje.

Mparata ‘a lezione te lasso sultanto

si ‘o santo passa sott’’o balcone,

si c’è bisogno ‘e qualcosa a nu passo d’’a casa.

Si ‘a vita è n’affacciata ‘e fenesta

é meglio ‘o terrazzo, ‘o balcone

pe chello ca resta,

p’’o sole ca jesce,

ca me giro e te veco

ca si me chiamme io arrivo

c’ancora so’ vivo pe tutt’’a jurnata.

Gioacchino Ruocco

Ostia Lido          07/04/2015
Inserita nella raccolta "Ce steva na vota..."

Dimme ‘e che panne vieste

Dimme ‘e che panne vieste

ca te cose na veste

a mmesure pe tte.

Canuscennte meglio

t’accummoglio cu gusto

e eleganza

ca si a nnanze accummoglio

nun voglio po’ ‘o culo scupierto,

ca qualcuno po’ jesse dicenne:

                                           -          Ma qua’ sarto t’’a fatto ?

Dimme che panne vieste

quanno ‘a sera te spuoglie

c’’a matina int’’o ‘mbruoglio

nun sbaglie cu ‘e tuje

e me trovo vestuto

cu na pettola corta

e na sciassa ca manco me trase.

‘E fatte ca cunte,  so’ cunte

ca nun sempe me vanno.

Int’’a cchiesa cagno scanno

a sinistra, po’ a destra

po’ a nnanze, po’ a rreto, po’ fore.

E si more addo staje ?

Gioacchino Ruocco

Ostia lido                 01/03/2015

Inserita nella raccolta “Ce steva na vota”

Ce steva na vota

Ce steva na vota ‘a pacienzia ‘e Tatillo

ch’era n’nommo tanto tranquillo

ca comme jeva o comme veneva

tutte cose s’alliggereva.

LL’ommo cchiù ‘nfame ‘e isso redeva,

ca ll’ommo cchiù onesto a isso piaceva.

Faceva na vita ‘e pane e cepolla

‘e stiente e fatiche,

ma teneva na figlia Tatella

ch’era nu poco spullecarella.

Ma nun jenno p’’o lluongo e p’’o stritto

ve conto ‘o fatto deritto deritto

comme fuje ca Tatillo perdette

‘a pacienzia e ‘o rispetto

pe chi rispette ‘un avette p’’a figlia.

Cusumiello c’ogne gghjuorne passava

ogne juorne ‘e cchiù s’allargava

cu Tatella c’appena ‘o vedeva

sempe attuorne lle jeva

ch’era ancora na guagliuncella.

Pe farla figliola ce ne vuleva.

LL’Urdemo dente ll’era caduto

cu bbona salute a diece anne,

ma ‘o guaglione ca già s’allizzava

‘a tuccava e ‘a facette ‘mpazzì

ca chiagnette pe tutt’a jurnata

‘e nu chianto ca nun ghieva a fernì.

Comme fuje e nun fuje  mmiez’’o chianto

l’ascette  chello ch’ero succieso.

LL’ommo primma nun ce credette.

Nun puteve essere stato chillu

cricco, chill’ommo de niente.

O t’acchiappe ‘e schiaffe e faie finta

‘o l’acchiappe pe pietto e ll’accire!

Qua’ ragione, qua’ piso ‘e sustanze

na panza po’ suppurtà ?

L’acchiappaje e le rette

cu santa raggione pe stuorte e deritto

na lezione ca chi s’allicorde

le tremma  ancora ‘a voce a cuntarla,

pecchè ‘a tanno nun se cchiù visto

Nu fatto comme a chisto.

Nun ve conto ‘o riesto

pecchè ‘a pasta s’è cotta.

Si se ntosta l’aggio fa cu ‘a ricotta,

na frettata e ll’uoglio ‘n avaste.

Ce sta ggente ca sceglie ‘a ragione

e po’ ‘o vuto.

Gioacchino Ruocco

Ostia Lido   27/02/2015

Inserita nella raccolta “ Ce steva na vota”

‘O viento ‘e terra

‘O viento ‘e terra è friddo cchiù da neve.

Se porta appriesso ‘a freva e ‘a nustalgia

d’’o sole cucente ‘e ll’estate

appena passata.

Arriva d’’a muntagna

m’attuorno nun ce sta

manco nu muntunciello

‘e terreno ca se lagna,

na zampogna

comme a nu ricordo

‘e ll’ati tiempe.

E’ overo ca dimane ce scurdammo

‘e tanta cose,

ma ogge ca vulevo ddoje rose

ncopp’’o terrazzo

‘o viento me strapazzo

e chiure ll’uocchie

ca cchiagneno tristezza e pecundria.

‘A vita mia pare nu muorzo sulo.

Fino a dimane pare ca io moro.

Ascesso fore

ma nun tengo ‘o curaggio

‘e m’arraggià

cchiù ‘e chello ca io pozzo.

‘O friddo dint’a ll’osse

me fa tremmà cchiù d’’o nicessario.

Quatte magliune  ncuolle

e po’ nu sillabbario

‘e si, ‘e no, ma, forse.

E tu ca staje attuorno

e nun me lasse ‘e pere.

Te voglio ancora  bbene

ce crire o nun ce crire.

Chesto ‘e mumente nire

e vvote fanne dicere,

ca po’ è ‘a verità.

Mò ce vuelva ‘o friddo

pe t’’o fa azzettà!

Gioacchino Ruocco

Ostia Lido        29/01/2015

Inserita nella raccolta “Ce steva na vota…”

Si appuro ‘a verità…

Si appuro ‘a verità so’ fatte tuje !

Na mano annaze e arreto

comme si arrevata a casa mia,

dint’a stu core

ca more ‘e gelusia,

ma nun t’è fatto maje nu tuorto.

E’ overo storta va deritta vene,

ma dint’’e vvene che ce tiene tu ?

‘O sango ‘e chi t’è vvivo

o ‘e chi t’è mmuorto

ca n’arrefrisco

Nun l’aggio maie sentuto

‘a vocca ‘a te.

Si fosse stato sulo na buscia

t’’a perdunasse, ma na ‘nfamità…

Ma comme se po’ ffà ?

Ma comme se po’ ffà

ca tutt’’e juorne

m’allisce e daie piacere

e ‘a sera me miette scuorno ‘nfaccio

ca manco nu criaturo m’’o facesse.

Si nun so fesso, chi sa chi tu me crire ?

Suspire a centenare

e tu cu chi te pare meglio ‘e me,

sotto a chist’uocchie!

Ma ce pienzo  o no

c’ormaie ire sulo nu commò

c’’a rocchia nun vulè cchiù sentì ?

Si stammo ancora assieme, Catarì,

chi ce ruagne si sultanto tu

ca t’è pigliato primma ‘a giuventù

e ogge ‘o riesto

ca ‘mpriesto a chi vuò tu

ma a Giesù Cristo niente.

Ma ‘o ssaie che r’è ‘a pietà ?

Lassammo stà !

Pure staserà

me staie facenno fesso !

Invece ‘e duje spaghette

m’è cucinato allesse.

Gioacchino Ruocco

Ostia Lido          29/01/2015

                                             Inserita nella raccolta “ Ce steva na vota…”