C’ava capì …

Il sacrificio di Isacco di Caravaggio

Ddio c’ava capì ca nun capette ?

C’Abbramo sulo p’ubbirienza  

era pronto a levà a miezo Isacco ?

O Abbramo so mettette dint’’o sacco

sapenno ca pe Ddio era na prova

o na jastemma grossa quanto ‘o munno

ca  maie avesse fatta ?.

Addo sta scritto ca Ddio é canuscenza

e po’ nun sape si dint’’o core ‘e nomme

quantu bbene ce sta pe cumpiacenza

pecchè  accunsente a chello ca vo Isso?

Pe me nun ce sta requie

pe chi s’aspetta qualche risposta a me.

Si averamente ‘o fatto succerette

è stato raccuntato e n’atu modo.

Doppo ca Ismaele se ne jette

‘o viecchio ascette ‘e capa

penzanno ‘o figlio suio mmiez’’o deserto

sulo ca mamma mmiez’a ggente nfame

o sicco nganna si ‘o macava ll’acqua

e se nquartaie cu Sara, vecchia comm’isso,

ca nun vulette cedere ‘e nu passo

e s’ammentaie chello ca s’ammentaie.

Si na mamma è na mamma

nu pate che po esse? Nu pate pecche è pate!

Nun era n’ommo ‘e gesso.

Era ‘a pietà ca Ddio vuleva ‘a isso,

uno ca diceva pane o ppane e Ddio a dio,

ca ne vuleva uno quanno sulo sulo

nun teneva cunforto ma sfastirio

d’’e strille d’’a mugliera ca chiagneva

maledicenne a essa e a mala sorte

facennese a cchiù vecchia ‘e tutto ‘o munno

senza nu figlio mbraccia ca zucava,

senza sapè ‘o viento addò ‘e purtava.

Teneva Abbramo, ma viecchio comma essa

cu ‘a pella ormaie arrepecchiata e secca.

S’arricurdavo bello e quanno s’a pigliva

dint’’e braccia e le vasava ‘a faccia

E tutt’ammore che le deva cuntannele

d’o tiempo già passato e ‘a vita comme jeva.

Era n’ommo ‘e Ddio c’’o vuleva

sempe cu isso pe jì cu isso nnante ‘ncopp’a terra

pe fa stu munno chino ‘e maraviglia

e no nun munno ‘e guerra

comme già succedeva.

Gioacchino Ruocco

Ostia Lido    05.06.016