Me piglio quase scuorno...

Nu cielo che fa acqua ‘a tutte parte

e ‘o core ca s’astregna e me fa male

e tu ca rieste fore fino a tarde

senza me da nu segno ‘e quanno tuorne.

Me piglio quase scuorno

d’’o bbene ca te voglio,

ma prima ca sgravoglio sta matassa

tiempo ne passa o n’adda passà.

Nun è cchiù primavera e chesto ‘o saccio.

‘O veco ca me fuie ‘a dint’’e braccia

mò cu nu mutivo e mò cu n’ato.

Tiene ‘a che fà e aggia avè pacienza

comme ne tiene tu quanno me metto

appriesso a nu pensiero e nun ‘o lasso

fino a quanno nun trovo ‘a parola

ca s’azzezza cull’ate e fa l’effetto

ca voglio, ca se tira appriesso ‘o core

‘e tanta ggente e ca te fa sentì

nu sentimento comme si fosse nuovo.

Ma fore quase chiove e sule tu

‘o ssaie addò te truove…comme maie

nun chiamme, ca io te sto chiammano e

nun rispunne, comme si ‘o munno fosse

cchiù gruosso ‘e chello ch’è.

E guardo ‘o cielo e spero ca mò schiove.

Se songo fatte ormai quase ‘e nnove,

n’atu minuto e vengo a te cercà.

Te voglio bbene, ‘o saie, c’aggia fà ?

Ostia Lido        4 gennaio 2012            17,40

Gioacchino Ruocco

Dalla raccolta: E’ ancora primmavera