Si tu m’accuordo…

Piazza Orologio

Si tu m’accuordo sulo nu minuto

te spiego tutto ‘o fatto comme è ghiuto.

Io ca nun tengo ll’arte ‘e tanta ggente

e manco ‘e scarpe ‘o pere

cielo ‘a guardà e terre ‘a cammenà

vaco giranno attuorno ca speranza

ca giranno me passa ‘o male ‘e panza

‘e sta cu ‘e mmane mmane

ormaie ‘a mise ca so’ cchiù ‘e na semmana

e allora chiede a chisto e doppo a chella.

Chi te vò dà ‘a fresella e chi ‘o biscotto

e chi, se vò levà qualche cappotto,

me dice: -  saglie ‘ncoppo, t’ammesure.

Può stà sicura ca so’ sule chiacchiere.

Bastasse qualche pacchere p’’e fà fernì,

ma io nun songo ‘o tipo ‘e usà ‘e mmane,

ch’’e vvote morzeche

pe ccomme vanno ‘e ccose.

Jesse pe torze, ma nun è tiempo

c’’a campagna abbrucia sott’’o sole

e io nun cerca chi dice na parole

e po’ t’attacch ‘e mmane pe na vita.

ME SO’ ‘MPARATO CA NU GIRAVITE

avasta pe girà ‘o vico appriesso

ca si nun vaie ‘e presso, ogge o dimane

qualcuno aiesce cu nu quatto ‘e maggio.

E ‘a casa è ‘a nosta ‘int’’a sti paragge

addò te piace ‘e stà  pe ll’aria fresca

c’asciutta ‘e panne pure ‘e juorne nire

t’affaccie ‘e vire ‘o mare quanno stire

o io m’astregno a te cu nu suspiro

ca nun te lascia requie ‘e te vulè.

Na pianta rampicante fore ‘a loggia

s’arrampeca addo io vulesse stà

pe m’arrampà quanno è passato maggio

e ‘a ggente nun fa chiacchiere p’’o vico.

Chello ca t’aggia di' meglio c’’o ddico:

-          Sta casa sembrarrà nu paraviso

pure si qualche ‘nfame me vò ‘mpiso.

                                                               Gioacchino Ruocco        

                                                               Ostia Lido           21.06.016