S’è miso ‘mperechicculo stu core

S’è miso ‘mperechicculo stu core

ca si avesse jì qualcosa stuorto

me tuccarrà pigliarlo ‘a terra muorto

pe  'o purtà deritto ‘o campusanto.

E p’avantarse va dicenno a gente

c’arteteca ca tene ‘o farrà santo

c’’a tene pe fa sule cose ‘e pazze

pe correre cchiù nnanze d'‘a carrozza.

E quanno corre allazza, allazza, allazza

ca nun s’arracapizza manco ‘o viento

pecchè isso corre cu tutt’’o sentimiento

dannese all’ate cu ll’anema e cu ammore.

Appriesso a isso nun tengo cchìù ragione.

Me piglio ‘o tuorto e me ne stongo zitto

pure si sotto sotto io sfrjio comme

si fosse nu suffritto e no nu broro.

Quanno m’addormo tiro nu suspiro

e ‘o  suonno me ne porta chianu chianu

ma cchiù luntano vaco e cchiù me perde

ca faccio na fatica a turnà arreto

pe dint’’o verde e na muntagna fredda,

pe coppe ‘e rripa ca careno perdennese

addò ‘o respiro quase me s’arrenno

e trovo a stiento tantu sentimento.

Gioacchino Ruocco

Ostia Lido                           21/11/2016