Steve dint’’a cupa abbasci’ ‘o puorto

Steve dint’’a cupa abbasci’ ‘o puorto

e ghiastemmave a tutte ‘e chit’è mmuorte,

annanz’’o vascio comme a na pullera

appena fatto juorno fino a sera.

Carmela era rimasta sola sola.

‘A guerra se purtaie a Rafiluccio

ca se scurdaie d’’a casa e da mugliera

o era muorto spierzo, chi ‘o sa.

Steve ‘mpazzenno e ‘o lumino ardeva

annanza ‘a fiurella d’’o marito

fino a ca nun mettette ‘o cannelotto

c’’a luce le teneva cumpagnia

senza fa fummo e senza rischio ‘e ‘ncendio.

Venneva sciartapelle americane

e mmiez’a lloro ce truvaie na giacca

e dint’a essa na cusarella ‘e sorde

e nu biglietto cu n’address scritto.

Songo rimasto sulo e beneritto,

si tu me scrive ce accurdammo e vengo

te piglio e te ne porte addò sto io.

Sembraio ‘o cunto ca cuntava ‘a nonna

quann’era vierno attuorno a na vrasera

e cuceane patane sott’’a cennere.

Nu princepe ce steva assaie luntano

c’’a gente ‘o chiammava ‘o  mericano.

Era rimasto sulo doppo ‘a guerra.

Sbatteva ‘e piere nterra pe scetarse

e ‘a capa ‘nfacci’ ‘o muro p’addurmirse.

Ma a isso chesta vita nun piaceva

e nun sapeva che puteva fa.

Arrevutaie tutt’’e tiratore

chiammaie a uno ca veneva ‘a fore

e le vennette ‘e ccose d’’a mugliera,

d’a femmena ca steva ‘nziemo a isso

ca se ‘mbricava e ‘o lasciava spisso

senza cucinato pe magnà.

Mettette nu biglietto int’a na giacca

cu duje bigliette verde ciento e ciento

penzanno ca si fosse capitato

a chi penzava isso ‘o fatto s’accunciava.

E come in fatto nu juorno l’arrevaie

na busta cu nu foglio arremmeriato.

Vieneme a piglia, m’aggio stancata

‘e fa sta vita ‘e pazza, ogne juorno.

Chisto è ‘o nderizzo: stongo dint’’a cupa

abbasci’ ‘o purto doppo ‘o vico sturto.

‘O nomme mio è Carmela ‘a sapunara,

ma songo onesta, spialo a chi vuò.

Pur’io ero spusata, ma nun è cchiù

turnato, ormaie so’ anno. Io campo

onestamente, arrangianno chello

ca pozzo tirà fora ogne ghiuorno.

Tengo attuorne tanta muschigliune

ma dint’’a casa mia nun ce trasuto

nisciuno maie a fore ‘e mio marito

ca chi ‘o sa addò sarrà perduto.

L’ommo leggette e rileggette ‘o foglio,

n’amico ca capeva le spiegaje

‘o fatto comme steva, ch’era overa

Ca chi screveva  era sincera.

Partette na matina all’intrasatto

ca uscia le dicette ma piglia e parte

tante na cammenata che te costa.

Nu poco ‘e faccia tosta ancora ‘a tiene.

Quanno arrevaie ‘a Torre rummanette.

Ancora sgarrupato stu paese

teneve voce ca isso già capeva

e se mmischiaje tra ‘a gente fino ‘o puorte.

Quann’arrivaie a Carmela rummanette

cu ll’uocchie ‘a fora tanto era bella.

Essa ‘o guardaje  e subbeto capette

ca era l’ommo suio, 'o mericano.

Mettette a capa sotto e scurnusella

facette finta e nun vedè nisciuno

mentre s’’o guardava sotto sotto

comme a nu raggio ‘e sole dint’a ll’uocchie.

All’intrasatto comme a nu mancamento

s’addunucchiaje pe terra e là restaie

fino a ca l’ommo nun s’avvicinaie

e le dicette: - Carmela mia

songo arrivato justo p’aizarte.

Miette da parte tutto e vienetenne.

E essa zitta zitta s’astrignette

a ‘o pietto suio e là ce rummanette

fino a ca  ‘un se facette sera

e isso la purtaie dint’’a casa

addo ‘o riesto succertte ambresse

felice comme vonno ‘e cunte antiche.

E dint’a cupa ce fuie nu poco ‘e festa.

Io torno, torno nun ve lascio maie

Ma pe turnà ne so passate ‘e anne

Mò parla americano e spenne e spanne.

Gioacchino Ruocco

Ostia Lido            15/11/2016