‘E piennele…

Pure chist’anne te si fatte ‘e piennele.

So’ pummarole belle ‘e primma scelta.

Chi sa che barzanella ca ne vene.

e quanta fatte mie le cunte a lloro

quanno m’aspiette e se tarde ‘a sera

pe vie d’’o tiempo o ca nun passa ‘o treno.

Chesta fatica mia sta fore mano,

sta sempe addo nne steva addo è stata

‘a quanno ‘o pataterno l’ha criata

cu na mesata bbona ca va e vene.

Porta pacienza ‘e vvote tu me dice

e io so felice ‘e sentere c’’o ddice.

Addò ‘o trove n’atu posto bbuono

ca manco ‘o ppoco ‘e terra dà cchiù niente.

Na vota tira ‘o viento troppo friddo,

na vota ‘o sciummo cu tanta fetenzia

e penza ca io guaglione m’’o bevevo

a dint’’e sirche fresca e trasparente.

Si nun fosse p’’a ggente e p’’e ricorde

ca nun me passeno d’’o core e ’a mente

cagnasse vie, cagnasse appartamento

ma che faccio, sicuro si scuntenta.

Me dice sempe ca un te mporta niente

ma ‘un so sicuro ‘e chello ca me dice.

Voglio vicino a me ca si felice,

e faie ‘a vita ca te piace ‘e fà.

‘A sera ascimmo sempe a fa dduie passe

ma cchiù ‘e duie nun ce ‘a faie a fà

allora ce assettammo ‘nfacci’ ‘o mare

e sule tanno tuorne a t’appacià.

E si me daie nu vaso io te ne dongo…

duie, quante ne vuò o ne vaie truvanno

comme a quanno eremo guagliune

c’accumminciave a uno e jve a tante

e io nun m’’o facevo dicere ddoie vote

‘e turnà a casa a rompere ddoie ove.

Gioacchino Ruocco

Ostia Lido 02.09.019