Quanno me tremmeno ‘e mmane…

Quanno me tremmeno ‘e mmane…

Quanno me tremmeno ‘e mmane

o ‘e piede nun ne vonno cchiù sapè

nun me resta c’assettarme e guardarte

ca si tutt’’o munno pe me.

Si te pare na fessaria pe me

è ‘a cosa cchiù grande ca pozzo fà

comme si fossemo a Marechiaro

comme chella fenesta fusse tu.

Che ddice ‘a canzone ? Cantamella !

Quanno  ce sponta ‘a luna e ‘e stelle

‘ncielo appareno nun c’è cchiù nniente

ch’è cchiù bello ‘e te.

tremmeno ll’onne de lu mare

comme io tremmo mò si guardo a te.

‘A siente quanto è bella sta canzone

me dà speranza ca tutto stu tremmore

m’’o sento ‘ncuollo quanno veco a te

e ‘o core se ne scenne ‘nt’’e cazette

quanno t’aspetta e vò vò sta cu tte

passanno na nuttata core a core.

Comme se po’ murì quanno se more

stanno vicino a chi se vò cchiù bbene

senza penzà cchiù ‘e ppene de l’ammore,

manco si ‘o core te fa male ‘e more

dint’a ll’onne d’’o mare ca tremmeno

pe te, p’alliggerì ‘o dulore

‘e na passione c’ancora ‘o tuzzulea

ca nun se vò arrenno a’o cielo c’’o pretenno ?

Gioacchino Ruocco

Ostia Lido        14.09.2019