So' troppo piccerillo...

So' troppo piccerillo

p'addeventà n'arillo

ca zerrea tutt'a jurnata.

Dint''e forre

nun ce stà ripose.

Mò scorre nu filo d'aqua

e mò 'o vverde se sciaqua

pe na nuvola 

ca va perdenno

tutt''e sentimente

ca se porta appriesso.

Nun vaco 'e presso

e quannp me 'ncanto

me pare nu santo

dint'a na nicchia,

dint'a na cappella.

Manco nu lecca lecca me fà specie

pure si 'o sole 'a cielo me 'ncuieta,

'o na preta

me rocele arreto

e nun me òascia cuieto.

Nun so' n'arillo

pure si 'e vvote canto,

nun songo nu poeta

ca nun riesco

a stà maie cuieto

e fà 'a perzona seria

comme qualcuno

va truvanno.

Vaco truvanno 

chello ca nun trove.

Ll'ove 'e miciello

e fristo fristille

na luce luce

dint''e capille

quanno se fà notte.

O crudo o cuotto

voglio passà 'a jurnata

magnanno nu vascuoto

'nfuso dint''a l'aqua

'e sta funtana 

ca m'arrefresca 'e mane

e chistu cannarone

ca pe nun perdere sciato 

canta na canzone

'ncuorpo a isso

pe nun scetà

attuorno

chille ca so' 'nfame

e fanno a notte e 'o juorno 

sempe uguale

stanno 'ncopp''e giurnale 

pe nun se fò scurdà.

Nun so n'arillo

pure si songo piccerillo

e zompo e comme zompo

pe nun truvarme 'o ffuocoarete 'e  spalle.

Gioacchino Ruocco

ostia lido 22.11.2019 ore 18,59