Stasera ‘a luna,,,,

Stasera ‘a luna
farà qualche capriccio
Se mettarrà nu velo
‘nnante ‘a faccia.

Me che m’accacciarrà,
me vene voglia ‘e dicere.
‘A luna è sempe ‘a luna
ca m'accumpagna
‘e vvote ‘int'’a nuttata,
quanno nun tengo voglia
‘e m’addurmì,
quanno te penzo
tutto scunfirato
p’’e juorne nire
ca me faie passà.

Vulesse
chelli nnotte ‘e passione
quanno
me faie ascì a ‘mpazzi
e chistu core
senza suffrì
‘e ppene ‘e tanta juorne
t’astregne ìmbracce
e nun se vò addurmì
cchiù nu minuto.

Stasera ‘a luna…
ma vide ‘e che te ‘mpicce…
farrà qualche capricce
comme ‘o solito
e po’ dint’a matina
s’addorme ‘mbracci’ ‘o sole
senza se lamentà
comme facimmo nuie.

Gioacchino Ruocco
Ostia Lido 10.01.2020

Ciao. Buon anno e buon lavoro, Gioacchino Ruocco