Mettimmo a capa apposta

 Mettimmo a capa apposta

 

Chello ca ce costa

ce fà campà

ancora qualche juorno

senza perderce 'e curaggio.

 

E' già passata

na bbona parte 'e ll'anno

ma si penzammo  a 'o riesto

senz'affanno

tirammo ancora annanza

n'atu ppoco.

 

Fino a c'appicciammo 'o ffuoco

me pare miezo juorno

e quanno se fa sera

cu te vicino spero

'e campà ancora

tutt''o tiempo

ca me sento

ancora 'ncuollo

quanno te piglio 'e pietto,

quanno me sento muollo

p''o surore

e ll'acqua fresca

me fa zumpà 'o core.

 

Campà eterno

me 'nteressasse pure

ma campà

sempe appuggiato 'o muro

pe rest'allerta

nun saccio si cunviene,

si me vulisse bbene

ancora

quann'ammora s'è fatto nu suspiro

mentre te guardo

e 'o llardo fritto

proprio nun me va.

 

Quanno more

vulesse murì

pe fà

chello c''a vivo

nun riesco 'a fà.

Farme sentì a te ca staie luntano

passannete

na mano int''e capille

e sentirme ancora piccerillo

vicino a mamma mia

senza chilli chiante

ca facevo

quanno 'a perdevo 'e vista

fino a ca ‘un te vedette

e t'aspettaie

comme t'aspetto ancora

pure si nun 'o saie

o nun te n'accuorge.

 

Gioacchino Ruocco

25.08.2020       Ostia Lido