Pe te ‘mparà…

 

Pe te ‘mbarà a campà

acciacca e ammereca

c’’a Merica

nun è tanto luntano

e na capa ê pane

sempe t’’a po dà.

 

T’arrance

ma quanno vaie a France

‘o juorno doppo

staie n’ata vota ccà.

 

Che ce può fa ?

‘A presumenzia toia

nun te fa fa’ nu passo

si nun è nu sconquasso

tanto ca si tenuto arrasso

ȃ tante amice tuie

ca si ‘un te danno ‘o vuie

tu nun è pienzo proprio.

 

Si figlio ê prufessore

ma s’io fosse pateto

te mannarrie ȃ ll’asilo

ca tu manco nu pilo

te saie levà ȃfaccia

pecchè te piglio scuorno.

 

Tu nun si nu guaglione,

tu si nu maccarone

‘e zito senza ‘o buco

e chello ca t’accacce

è na superbia

ca nun tene fuoco

ca manco ll’acqua cauda saie fà.

 

‘O guaio ha fatto pateto

credenno ch’iro già nu pataterno

quanno cu ‘a penna mmano

facive sulo scippe

e nun sapive ch’ereno

sulo tiempo perzo…

 

Gioacchino Ruocco

 

Ostia Lido   17.03.2021

 

Inserita nella raccolta

“ Tipi, ma quanti tipi…”