Amma partì

A ddò vuo’ jì

ca quanno amma partì

me faie venì

na scunfirenzia

ca ‘un te voglio sentì

pe na semmana ?

E’ overo c’amma ascì

pe cagnà aria,

ca dint’’a casa

ce sta buono a stà

sultanto doppo asciuto

ca capa arrepusata,

quanno ‘e guaie ‘e fore

songo cchiù gruosse

‘e chille ca tenimmo,

ca chi te gire attuorno

so’ sfaccimme

ca ponne crià guaie,

ca quanno cumparimme

ll’amice

ca nun so’ amice

s’’a squagliano,

ca Ddio ‘e benedice

e stanno bbuono,

ca simme

comme ‘o lampo e ‘o tuono

e quatte chiacchiere

so’ n’appicecata

ca ne parlammo

tutta na jurnata.

Tu vuò guardà ‘e vetrine

e io vengo appriesso,

chello c’’a  me ‘nteressa

si ne parlammo

me pare ch passato n’atu guaio

e vaie ‘e presso c’amma riturnà.

T’ire scurdata

d’’a visita ca tiene,

ma po’ quanno turnammo

è nu mistero,

forse è dimane

o forse nun è overo.

Quanno se parte

ce vò tanta pacienza,

ma tanta, proprie tanta

ca si tu si nu santo

te vene a scunfirenzia.

Acchiappa a chisto, a chillo

e tiene appuntamento p’’e capille,

ce sta ‘o vestito

can un te va cchiù bbuono

e i’ addevento o chiuove

addò appienne tutto

o nfuso e chello asciutto.



Gioacchino Ruocco

01/03/2016 Ostia Lido