America

Manco cchiù cu ‘a fantasia

sto partenno,

ma so’ tipo ca ‘un m’arrenno

maie e po’ maie.

Io nun so’ nu passaguaie.

E’ overo che m’appeno

a ogne pilo, a ogne chiuovo,

ca so’ tuosto comme ‘e prete

ma me truove sempe arreto

pure quanno nun me vuò.

Si te miette mmiez’’e guaie

chi te truove affianco a te ?

Sempe chesta capa ‘e mbrello

ca pe ‘un te fa ‘nfarinà

piglia e fa Pullecenella.

Si America luntana

cchiù nun fosse,

m’avviasse ’ìnt’a nuttata

quanno duorme a suonno chino

ca scetannete a matina

tu nun me truvasso cchiù.

Ma facenno ‘o pare e sparo

si te lasse e me ne vaco

chi t’’o passa ‘o capo ‘e spavo ?

Quanta vota s’’o partuto

c’’o penziero sulamente

ca so stanco ‘e sentimente

ca nun paveno ‘a mazzetta.

Me ne guardo ‘e avè pretese

songo io ca t’’e dongo

ogne fino ‘e mese

‘e danare pe fa ‘a spesa.

‘N aggio ditto maie na vota

Chesto è ‘o mio e chello é ‘o tuoio.

Pecchè chesta è ll’arte toia

ca raccunte cu parole

ca nun voglia allicurdà

Io sto ancora, ancora cà

c’’a partenza è rimandata.

Si so’ crapa, c’aggio fa ?

Gioacchino Ruocco

Ostia lido      16.08.016

Inserita nella raccolta “Sfrennesianno”