‘E fiche

‘E primme ca cuglieveno d’’a pianta

a rete ‘a casa, quase affianco ‘o puzzo

ereno p’’e vicine. Chesta era l’ausanza

c’’a resenara ce metteva ‘nnanze

fino a ca ‘e ficucielle

nun cresceveno ‘a panza pure llore.

Qualcuna a coppe ‘e ramme terra terra

era nu paraviso quanno ce steva ‘a guerra

e sulo chello ce restava ‘e vvote.

Nu frutto e nu vascuotto

e ciuotto ciuotto ‘o stommeco rignevo

‘a faccia d’’e tedesche e americane,

d’’e bomme c’ogne notte ‘e cchiù careveno

tanto c’’a guerra nun ferneva maie.

Stu piatte ‘e fiche ca m’è mise nnanze

se salva sulo p’’a luntananze ca ce stà  tra nuie

si no a chesta ora  ‘un ce ne stesse una.

Me piacene ‘e guste ca tu tiene

e comme ‘e crisce, comme t’’e mantiene.

Speriammo ca facennese cchiù gruosse

nun fanno ‘e tuoste comme so’ tuoste l’uosse.

Falle pazzia e ridere fino a che stanche ‘a sera

s’addormeno vicini vulennese cchiù bbene,

comme a sti fiche prene ‘e ogne gioia

c’’a vocca ne vulesse a se stancà.

Gioacchino Ruocco

Ostia Lido              16/08/016