Beneritto ‘o core

‘O mare senza viento

pare nu male ‘e riente

ca s’è addermuto ‘a poco

appena s’è spustata

'a nuvela cchiù fore.

E tu carnale comme a sempe

me faie na carezza e tiene mente

chist’uocchie mie

pe capì si è overo

c’ascimmo che sta sera

pe nu giro.

Ogge me l’haje chiesto

cchiù ‘e na vota

pure si aggio risposte sempe sì.

Tu me vuò bene assaje

e io ancora ‘e cchiù

si no ‘e che campasse

tutta sta giuventù ?

Si quanno vene a chiovere

e tu t’astrigne a me

e io guardasse a n’ata

c’ammore ‘o mio sarria ?

Favezo e maleritto ?

Ma beneritto ‘o core

ca t’è purtato a me.

Io sto scialanno ‘e ammore

‘a quanno stò cu te.

Gioacchino Ruocco

03.03.017  Ostia Lidi