Quanta penziere aggio lasciato a mare,

Quanta penziere  aggio lasciato a mare,

cumpagne ca nun torneno all’appello

quanno ‘o tiempo è brutto o se fa bello

e siente ‘a voglia ‘e parlà cu loro.

Se nasce ‘e more. ‘A vita nun è eterna,

ma chi piglia ‘o terno ‘e campà ‘a vicchiaia

campa ‘e ricorde ca se so’ fatte amare,

ca si t’’e vuò scurdà nun saie comme.

Senza sapè ‘e chello ca me resta

torno arreto a quanno ‘e canuscette,

ognuno cu nu scisto differente

‘e vote guappe e ‘e vote strafuttente

pe nun perderse tra ‘e tanta preputente

ca dint’’a scola steveno ‘mparanza

ca se futteveno cchiù ‘e na marenna

lascianneto riuno  e ‘o male ‘e panza

A ‘miezo’’o mare me sentette perzo

cchiù ‘e na vota, quanno l’urizzonte

comme a na rota se metteva attuorno

e nun me deve pace pe cunzuolo.

Si te vuttave a mare addò putivo

truvà nu pizzo ‘e terra pe salvarte?

Luntano mille miglia a cunzularte

ce steveno penziere sulamente

‘e chi ‘a fine ‘o mese bene ‘o male

arrecuglieva ‘e solde d’a mesata

o ‘e qualche ‘nnammurata ca vuleva

sapè che ghive facenno mmiez’’o mare.

E intanto sulo ripassavo ‘e nurghe

‘e segne cu ‘e bandiere, 'e punto e linea

e riturnavo ‘a scola vulentiere

senza scurdarme a strada na matina.

Cucozze e cucuzzelle dint’’o surco,

palomme e palummelle dint’’o core,

gente ca more e ‘o munno se ne scorda

ca simmo troppe a campà sta vita.

E intanto cerco mò n’atu penziero

pe nun campà ‘e chille ca so ‘e iere.

Me sento furastiero ‘ncopp’a terra

nu juorno a mmare e n’ato mmiez’’a guerra.

Vulesse sta tranquillo ma nun pozzo

e pe resta nu poco sulo sulo

faccio comme ‘e vvote fanno ‘e mule

me metto a tirà cauce a ognuno

ca me passa arreto o ca se mette

a fianco, ca nun ce ‘a faccio a sentì cchiù

‘a voce ‘e chi me parla ‘e giuventù

e se lamenta comme a nu putipù.

Gioacchino Ruocco

Ostia Lido   06.06.017