'O figlio d''o Trippone

G. Ruocco - Lavoratore della terra

 visto di spalle.

1983 -  Tufo romano - h cm   37

‘O figlio d’’o Trippone

Quanno nascette

pareva Ninno santo a Bettelemme.

Quanno criscette

se facette gruosso

comme a nu Pataterno

e se piagliava isso

'mbracci’ ‘a mamma soia.

‘O figlio d’’o Trippone ‘a terra t’aizava

e te purtava ‘ncielo

comme a nu suscio ‘e viento.

Criscette  senza maie nu male ’e diente

senza ca chiagnesse meza vota.

Teneva tanto ‘e chillo sentimento

ca me sembrava ‘e vote na criatura.

Jettava ogne surore ‘mmiez’’a terra

e accussi  ommo ‘e fatica se facette.

‘E vizie manco a uno ne tenette.

Faceva chello ca sapeva fà

sempe cu na resata ‘mmiez’’e riente.

‘A vita soia

comme accumminciaje fernette

senza fermarse maje nu juorno sulo.

Na capa ‘e pane e dinto senza niente,

nu surzo d’acqua fresca sulamente

a differenza ‘e  tanta ‘e chella gente

ca d’’a matina ‘a sera mangia sempe.

Crisceva comme ‘o crisceto  d’’o pane

addeventanno na muntagna ‘e carne

ca comme a nu criaturo te guardava

sultanto c’’o gulio ‘e vulè bene.

Manco na mosca fuje accisa ‘a isso,

maje na vota che dicette: crepa

a chi qualcosa ‘e stuorto le diceva.

Restaie nu piezzo ‘e pane

e ‘o juorno ca murette

tutte mulliche ‘o tiempo ne facette

p’’a gioia ‘e  ll’aucielle

c’attuorno ‘e piere sempe se truvava

quanno qualcosa le careva ‘a mano.

Gioacchino Ruocco

09.06.017   Ostia Lido