A che juoco jucammo ?

Ogge a che jucammo ?

A chello ca vuo’ tu

ca meglio d’appicciche

c’é sta sultanto ‘o juoco

si nun ce appiccicammo

pure pe chesto.

Quanner’eremo guagliune

‘e juoche ereno tante

pe fa festa

ca festa ereno ‘e juoche

burdellianno tutta na jurnata.

‘O strummolo, ’e ffurmelle.

comme vuttava ‘o juorno,

si ‘o tiempo era bello.

si eremo guagliune

o ‘nziem’’e guagliuncelle.

P’annarià cumete

jevemo fin’’o mare

e p’annascunnarella

nmiez’’e canne

ch’’e vote ce serveveno

pe ghì a piscà ‘e vavose

ca quase ‘nterr’a rena

steveno a sciacquià.

Currevemo p’’e surche

comme a cavallo pazze

facennece nu mazzo

p’essere sempre ‘e primme.

‘O vraccio ‘e fierro,

‘a dama, ‘o sottomuro

E si chiuveva tiseche

cu ‘ e spalle ‘nfacci’’o muro

pe nun ce ‘nfonnere

pecché chillu cchiù nfuso

restava sott’a ll’acqua

fino a ca nun ferneva.

Proprio na banda ‘e matte

fino a chiammata ‘a tavula

pe doie patane cotte

o na nzalata ‘e pummarole ricce.

Satore, Peppeniello,

Antonio ‘o friariello

e chi s’’e scorde cchiù!

Chi s’ha scurdato maie

pure si assaie cchiù gruosse

n’hanno passate guaie

facenne ‘e caperedene

‘e tanta guappetielle

ca comme a micciarielle

ancora criature

già s’appicciavano all’istante

e mò pe fa campà

ce vo’ na morra ‘e sante.

Si ‘a vita fosse juoco

stesse sempe a jucà,

visto ch’è n’appiccico

io nun ce voglio stà.

M’apparte ‘e vvote

e ‘e ogne ricordo

ne faccio na poesia,

ma comme ce sfrenavamo

già ‘e primma matina

c’’a sera po’ murevemo

‘nzino ‘e mamme

stanche ‘e suonno

pe tutte sti pazzie.

Gioacchino Ruocco

Ostia Lido       27/04/2014