Sule duie file ‘e pasta

‘O tiempo mio, quann’ero guaglunciello,

duie file ‘e paste erano pure troppo,

ma m’arricordo ancora chillu tiempo

quanno azzicco azzicco mangiavamo

uno vicino a n’ato

e me pareva assaie cchiù ricco

nu piattello ‘e broro, 

na menestella ‘e verza

o ‘a pasta fritta 

ch’era rimasta ‘o juorno primmo.

Nun se jettava niente.

Pasta e fasule cu na scurzetella

era na sfugliatella.

C’’a panza chiena

jucavemo a furmelle, ‘e ritrattielle

e a ‘nnascunnarella

fino a c’’a tiella ‘un se rigneva n’ata vota

cu na patana fritta o n’uovo a uocchie ‘e voie.

Mo mangia o meglio m’arrangio

pe nun me fa cchù chiatto

‘e chello ca l’età me fa.

Però è sempe rrobba chiuse ‘int’’e buatte

o surgelate ca nun sanno ‘e niente.

‘A frutta arriva sempe a ll’atu munno

e ‘a nosta chi ‘o ssa che fine fa ?

Na mela rossa ‘e freva

nun tene cchiù sapore !

Sarrà ‘a vocca mia ? Ma ll’unico veleno

è chello ca tu staie sempe cchiù prena

e haie bisogno ‘e me pe tutte cose.

A miezejuorno famme 

sule duie file ‘e pasta

c’’a me ‘o ppoco avasta.

Gioacchino Ruocco

Ostia Lido     29/04/2014