Quanno si prena...

Quanno si prena

tiene mille voglie

e quanno no

me faie mille mbroglie.

Mille ca songo mille

e faie pilo pelillo

tutto chello ca faccio

o chello ca te dico.

Nun sia maie,

ma p’essere sincero

quanno te dico ‘e vvote

ch’è ‘o cuntrario

me piglie e me strapazze

fino all’osse.

Me faie tremmà sti cosse

e ‘a voce se ne scenne.

Mannaggia a chi m’appenne

e nun me ‘mpiso.

E’ na jurnata nera!

Manco na risa

eppure ne dico scemità

pe na resata.

E’ nnera e comme è nera.

Dimana forse,

opure na carezza

quanno me passa a taglio.

Aggio sbagliato

e sbaglio tutt’’e juorne.

Me piglio scuorno,

quase ‘o facesse apposta.

Sulo ‘int’’o stritto

nun se tire arreto.

Cu ‘e spalle contro ‘o muro

pare ca nun è overo.

Primmo nu vaso

e doppo na carezza

sena penzà cchiù a primma

si no rischio ca perde

ancora n’ata vota e resto

comme a nu limone verde verde. 

Gioacchino Ruocco

Ostia lido               22/04/2014