‘E sepolcre...

Si nun t’è fatto ‘e ssette chiesielle

addò si ghiuta aiere passianno ?

So’ passato pur’io a San Nicola

a San Liborio, dint’’a Pigna secca

ma sulo addore ‘e ncienzio se senteva,

chell’addore ‘e chiesa

ca te piglia ncanna

e porta qualche spaseme p’’o pietto.

Te vulevo vedè, ormaie so’ juorne

ca nun me daie n’ombra ‘e cunfirenzia

e ‘a Madonna d''e grazia

na grazia aggio cercato

mentre guardavo tra n’arcata e n’ata

dint’’o viola c’apparava ‘a chiesa.

Friddo s’è fatto ‘o core

ca me sentevo muorto comme a Cristo.

A san Francisco ‘e Paola, San Ferdinando

e a santa Brigida, addò stive ?

Pe ppoco m’è pigliato nu currivo,

n’arraggia che faceva suffrì tanto

comme a chi soffre

e nun ne trova gioia.

Sulo a Tuledo n’ombra m’è sembrata

sott’o ‘o vraccio cu ‘ato

core a core,

ma po’ mentre vicino t’arrevavo

‘a dint’a ll’uocchie

ll’ombra scumparette.

Nun ire tu

e me sembraie n’ata:

na sumiglianza ca quase m’accerette.

L’anno ca vene

nun ne parlammo cchiù.

Ognuno fa ‘e sepolcre

addò ‘e vo’ fà.

M’assetto int’a na chiesa

e nun me movo ‘a llà.

E prego ca se sceta ‘o Pataterno.

Vulesse però pur’io piglià nu terno

pe me scetà sentennemo felice.

Gioacchino Ruocco

Ostia Lido    21/04/2014