lunedì 9 ottobre 2017

Forse Cenzino…

Pronto ? Chi è ? Vicienzo ?
Ve dico ‘a verità, ma vuie chi site ?
E’ tantu tiempo ca nun ‘o sentevo
stu nomme ca state dicenno.

Si eremo pariente, nun ‘ saccio !
Quanno screvette a nuie l’urdema vota?
Nun m’arricordo e si overo è stato.
M’avite ditto vuie, ma nun ce credo.

Tantu luntano, ma che ce faceva ?
Sentevo a mamma mia ca me diceva
‘e nu parente ca nun vedeva ‘a anne.
Ma si le dumannavo chisto chi era

sbarrava ll’uocchie e nun s’arricurdava.
Si era chillo ca dicite vuie
cu ‘e carte ca tenite, sarrà isso.
Che me vulite di? L’aggio capito.

ca chisto ‘un ce sta cchiù, ca se n’è ghiuto.
all’atu munno, m’avito ditto vuie
Datelo ‘e puverielle
chello c’ha lasciato,

ma si ha lasciato diebbete
cu me nun me cuntato
ca ‘e cunte mie stanno tutte a zero.
Vicienzo? Forse Cenzino,

ma era piccerillo piccerillo.

Tantu luntano chi ce l’ha purtato ?
Scusate si 'un ce stongo cchiù c’’a capa
chella è ‘a miseria ca fa brutte scherze.
Stongo cu l’ago mmano tutt’e juorne
e arrepezzo, arrepazo e panne mie e ‘e ll’ate.

Gioacchino Ruocco
09.10.2017 Ostia Lido