Si fusse 'a luna...

E te ne fuje  ‘a dint’’e mane mie

comme si fusse ‘o viento

ca ‘e tantu bene ‘e Dio

nun me rummane niente.

Che te ne fuje a fà

si ttuorne a me cercà

c’’o male tiempo ?

Resta cu me

pure quanno è bello,

quanno ‘e nnuvole

‘ncielo nun ce stanno.

Cu ll’uocchie ca zenneiano

a ogne bavattella

chi sa quanta resate

ce facimme.

‘A vita è bella,

ma cu te cchiù assaie.

‘O saie pure tu

ca miez’’e guaie

me vaie cercanno

pe t’accujtà.

Stanotte ‘ncielo

ce steve na stella

cu ‘a stessa resatella

ca tu tiene

mponta a stu musso

russo

e chine ‘e vase

ca quanno trase

nun me ne perdo uno.

Si fusse ‘a luna

te curresse appriesso.

Meglio ca rieste ccà.

Pe me è ‘o stesso

cu sta felicità

ca tu me daie

appena ‘mbraccio

vasannette sta faccia

e sti capille

comma a scarole riccie.

Gioacchino Ruocco

Ostia Lido         10.10.017