Chiacchiere ‘e casa

Chiacchiere ‘e casa,

chiacchiere ‘e famiglia

Tanto pe parlà

ma chi me piglia?

Pe ce capì cchiù assaie.

quanno na femmena

nun se trova cchiù,

puoi dì ch'è morta,

ca nun s'è chiude ‘a porta

arete ‘e spalle

p’’a na pazzia c''a manteneva a galla

pe fa vedè ca tiene chi te penza.

Passato ‘o friddo

arape ogne credenza

e mange e mange

'nfin'a ca nu delore ‘e panza

te fa passà ogne malincunia

quanno t’accuorge

ch’è sulo gelusia

ca nun c’è niente

ca te po’ dà penziere,

c’’a vita se fà a duie

pure si ll’atriere t’è paruta

pe na parola 

ch’iro nu curnuto

e invece songo cose

ca cu ‘a vita ‘e ogge,

cu tutt’e cunfidenzie ca ce stanno

cu tutt’’e ccose

ca vanno dicenno

ognuno appenna ‘o pinnelo

addò le pare ‘e piace.

Sulo si si capace

‘e restà ‘o posto tuio

se resta na famiglia,

restamme ancora nuje

ca stanno a pazzià

pure si chi pazzea

dice ‘a verità

facenno ‘o giro largo

pe nun se ntussecà.

Dicimmancella sempe ‘a verità.

Nun è ca fino a mò nun t’aggio ditto.

Quanno me vide afflitto

nun penzo malamente.

‘E vvote nun me sento

e nun t’’o saccio dì,

ma ‘a ccà a capì

ca nun te voglio cchiù

ce vò nu core tuosto,

ce vò nu fatto apposto

e no ‘a giuventù

c’ancora dint’’o core

sento ca m’è rimasto.

Basta ca vutte ‘a pasta

pe me è miez’’o juorno e basta

Gioacchino Ruocco

13.11.017                  Ostia Lido