Quanno ‘a cumeta….

Quanno ‘a cumeta….

Quanno ‘a cumeta ‘o vvo’, dalle cuttone

fino addò ‘o viento ‘a porta.

c'aret’’a porta nun se cumbina niente,

manco nu suonno quanno duorme a notte

e staie sott’a cuperta c’’o friddo ‘ncuollo

ch’è ‘a vota bbona pe cagnà stagione.

Na maglià ccchiù pesante e te ne futte

cu ‘a capa rotta  ‘un se cumbina niente.

A me ‘e vote nu poco ‘e sentimento

me salva a tanta guaie e so’ nnucente.

Comm’ero accussi resto guagliunciello

ca va acchiappà palomme ‘miez’’e surche.

ca si s’avesse rompere ‘o cuttone

me resta’ ‘e guardà ‘o cielo e nun so’ bbuono

‘e perdere ancora n’atu juorno

tutt’’e penziere mije e ‘o riesto appriesso

ca fernarranno nun se sape addò

e si qualcuno ‘e trove che ne fanno.

Chille ch’’e vote jocano cu me

pigliano a sfottere ‘o munno sano sano

ca si sapessere c’ancora penzo a te

me facessero p’’a risperazione

chiagnere ancora ‘e quanno tu partiste

c’ancora ‘o core nun se sente bbuono.

Dalle cuttone e nun te risperà.

Dimane ne farraie n’ato cchiù bello

cu ‘a carta tosta e cu ‘e fierre ‘e mbrello

nu cape ‘e spavo ca po’ arrevà addò vuò

ca si te pierde appriesso saie che bello

quanno te scite e staie cu ‘e piere ‘nterra.

Gioacchino Ruocco

Ostia Lido  07.11.017