‘O tiempo ‘e chiagnere

‘O tiempo ‘e chiagnere

pare ch’è fernuto,

mò nu saluto e basta

pure si ‘o core

sento ca s’astregna

quanno me daie ‘a mano

quanno ‘int’’e braccia toje

pe nu minuto

me sento comme ‘o pizzeco

ch’’e vote tu me daie

pe me lascià ‘o segno

d’’o bene ca me vuò.

Ammore carnale,

ammore ca vuttava ‘a pasta

quanno senteva

‘o sciato mio ‘nt’a ll’aria,

ca te sentive male

quanno io stevo male

ma nun me lamentavo

e te dicevo ca nun era niente

e me ne jevo a chiagnere

dint’a n’aria cuieta

‘nterra Surriento,

ma senza ‘nfamità.

Nun aggio maie penzato

c’’o male porta o bene,

forse a chi cunviene

si se fa bbuone ‘e cunte.

Quann’ero triste

me pigliave ‘e mmane

e me ne purtave

luntano a fa nu giro

addò ‘o viento

‘e lacreme asciuttava

e ‘a mano toia me deva

‘a pace ca mancava.

Quanta suspire

tu me cunfessave

pe te sfugà nu poco,

ma ‘int’’o fuoco

‘o core me sentevo

pure si chiaitave

pe te ati surrise.

E vote me vuttavo

dint’’o ffuoco

cu tutt’’e panne ‘ncuollo

cu ‘a cammisa

pe nun bruciarme ‘e scelle.

Gioacchino Ruocco

Ostia Lido           19.11.017