Sapennte felice...

Sapennete felice…

Ce sta nu viento ‘e mare c’atturciglia

‘e ramme ‘e tutt’’e piate ‘o lungomare.

Pare ca ‘s’’e piglia p’’e purtà

p’’o corso ch’è cchiù arreparato.

Ormaie ce songo abituate

comme a te ca ne supporte tante

pe sta nziemo cu me.

comme a na nave ca nun affonna maie.

Ma che ne saie ‘e chello ca succere

mmiez’’o mare si nun ce miette pere?

Pare ca s’arrevota ‘o munno, ‘a terra

ma nun se move ‘a llà, manco si accide.

Guardo sti cimme d’albere

addò me truove dinto.

Vulesse fa cupinto cupinto

ma nun me vene ‘a voglia

e m’arravoglio allora

dint’’a nu penziero

e furastiero me ne torno addò

so state pe tant’anne fino aiere

e ognuno se faceva ‘e fatte suie.

A che so’ riturnate simme duie

ca ll’arte d’’e pazze stanno a fà.

Quanno me vire 'e vote t’ascunne

‘int’’o palazzo cchiù vicino

capace ‘e ce restà fino a fà notte

mentre dint’a stu votta votta,

dint’a stu viento ‘e mare

te cerco ‘e nun te trovo

pe te fa ragiunà primma ‘e sta notte.

‘O friddo mmiez’a via

è ‘a cchiù brutta cosa

quanno te piglia’o suonno

e ‘o core ‘n arreposa.

Quanno me sento perzo

me piglia ‘a scunfirenzia.

Si proprio t’aggia perdere

pecchè tu nun me dice

chello ca vuò a me ?

Sapennete felice

io forse m’arrennesse,

ca ogge nun è tiempo

‘e ce fa ancora fesse.

Gioacchino Ruocco

16.03.018         Ostia Lido