Vieneme a scuntà

Vieneme a scuntà

Vieneme a scuntà pe chesta via

ca ce ricimmo

‘o patre nostro e avemmaria

mentre turnammo a scasa

pecchè sta via

è troppa sulitaria

nun sulo ‘a sera

ma pure ‘a matina a ‘mbressa.

Chi va ‘e pressa

nun me guarda manco

Ma chi ‘ncopp’a carretta

me mmita tutt’’e vote

ca me vere

e nun ce crere

ca m’’a facci’ appere

fino ‘o Saglie e scinno.

Manco si fosse ‘o figlio ‘e Matalena

ca saccio ‘a quanno è nato

io ce sagliesse ‘ncopp’a sta carretta.

Nun me respero

metto ‘a capa sotta,

cammino e guardo a nnanze

‘e fatte mie,

ma quanno viene a me scuntà p’’a via

sento ca risciata ‘o core mio.

M’astregno a te vicino

e ringrazio a Ddio

ca me vuò bbene ancora

comm’io ca te ne voglio.

E vvote m’arravoglio int’’e pparole

e nun t’’o sacio dì

comme vulisse,

ma si me guarde dint’’a ll’uocchie fisse

me faie fessa

n’ati cciente vote.

Gioacchino Ruocco

Ostia Lido   15.05.018