Ogne ghiuorno, tutte’’e juorne…

Ogne ghiuorno, tutte’’e juorne…

Ogne ghiuorno, tutte’’e juorne

ce refongo ‘o bbene ‘e Ddio

Poco è ‘o guaragno

e ‘o core me pogne.

Sarrà pure colpa mia,

ma me soso, lavo a faccia

ma cu chello che m’accaccio

pe tenerte ‘nziemo a me

pare poco, sempe poco,

comme ‘o ffuoco

ca s’appiccia e po’ se stuta

e me fa sta vita cupa

cchiù d’’o niro d’’a nuttata

quanno ‘o suonno e cchiù pesante

e nun sento manco ‘e sante

e nun sento manco a te

ca t’astrigne cchiù vicino

comme fanno ‘e pullicine

ca ‘intt’a notte ca fa friddo

vanno a voccola a cercà.

Quanno storta va ‘a jurnata

songo cauce ‘int’’e rine.

‘O patrone, nu mappino

strille e fa ‘a voce grossa.

Chi me dice ch’isso è bravo

sta ‘e parte ‘nziemo a isso

nu cachisso c’’a cantina

ne fa n’ommo vezziuso.

‘O guaragno ch’isso fà

se ne va pe chesta via,

ma si roseco sti riente

nun m’avaste ‘a ‘vemmaria

ca me siente ‘e di ‘t’’o suonno

ca me piglio ancora scuorno

c’’o ruagno è ancora poco

cu sti mmane dint’’o ffuoco.

Che te porto ? Addò te porto ?

Cu sta sporta ‘e tarallaro

sente sempe ‘a morte ‘ncuollo

ca si pure tu me muolle

aggio perzo ‘e sentimente

e me resta sulo a voce

pe cantarte na canzone

quanno stongo ‘ncopp’a croce.

Gioacchino Ruocco

15/06/018   Ostia Lido