Tra figlia e mamma.

Tra figlia e mamma

Mammà, tu m‘è ‘mbarata

a cosere e a fujì,

e a dicere sempe ‘a verità.

Venì ‘a sera

dint’’e bracce toie

p’arrepusà stu core

‘nzieme a ‘o tuio

pe ce guardà ‘nt’a lluocchie

e ce capì senza na parole

‘e chellè ca vuò dì.

So’ sango tuio

e ‘o sango ‘e chi t’è vivo

affianco a te.

Ma qua’ currivo

pozzo ogge tenè

si tu me guarde

e me dice ‘o mmeglio

qual è.

E si t’appasso

tu nun me lasse ‘e pede,

m’aspiette fino a tarde

pe capì

chist’ato ammore

addò po’ ghj’ a fernì.

Si rure, si me strure,

sì è chillo overo

ca te po’ piacé.

Na mamma ch’è na mamma

vò sempe ‘o meglio.

Si nun ‘o dà a vedè

cerca ‘e t’’o fa capì

pecché capisce

primma ‘e ognato.

Pur’essa è stata

ma pur’essa è

ancora na femmena

ca l’accedesse

p’’e tuorte

c’’a sempe s’è acchiappata

ma quanno stanno sule

pietto a pietto

nun fà mistero

e chello ch’essa sente

pe tutte ‘e sentimente

c’hanno cunzumate,

lavate e po’ stirate

è mise ‘int’’o ciardino

vicino ‘o mandarino

ad asciuttarse

primma ca se fa notte

p’’e fa passà ‘e delure

pe ce pazzià nu poco

fino a c’’o core

ce ‘a fa a suppurtà.

Gioacchino Ruocco

24.10.018   Ostia Lido