Che me vuò dicere ?

Dall'albun di Rosalba Spagnuolo

E stamme a fa nu girotondo ‘a n’ora

primmo p’’o corso e po’ p’’o lungo mare.

Te guardo e nun capisco che vuò ‘a me.

Te parlo e nun rispunne

e ll’uocchie tuie so’ triste

e nu saccio ‘o pecchè.

Che me vuò dicere ?

Si tu c’ha ditto: -Scinne ca t’aggia di na cosa.

E io te stongo a ffianco

stanco ‘e na jurnata

ca nun sta danno pace

e nun saccio ‘o pecchè.

‘O cielo ca vo sentere

pur’isso sta ragione

s’è miso a pecurella

e schezzechea ‘a n'ora,

ma tu nun te n’adduono

o faie finta ‘e niente.

Ma ce vò tanto a dicere

ca io nun te stò bbuono ?

Ma ce vò tanto

c’aggi pregà nu santo ?

Te si stancata ‘e me

o è qualc’ata cosa ?

Qualunque cosa è

è meglio c’apprufitte

‘e chistu tiempo ‘nfame

ca io fino a dimane

nun ce arrivo.

Me sento a freva ‘ncuollo.

Sto addeventanno muollo

comme a na scorza ‘e pane

scurdata dint’’o broro

‘a cchiù ‘e na semmana.

C’aspiette, oj ni,

ca io me votto a mmare ?

Gioacchino Ruocco

Ostia Lido           27.07.016