‘A verità ca tu te cride

‘A verità ca tu te cride

non è po’ chell’overa.

Chi te ne conto n’ata

a essere sincero

nun saccio che ce trova

a t’’a cuntà ?

Visto ca faticammo

ascimmo tutt’e duie

‘a dint’’a casa

ogne matina.

ce salutammo

ma ‘un ce dicimmo addio.

Io sto sempe ‘ngiro

e tu dint’a na scola

a fa lezione.

Tu tuorne primma ‘e me

e io cchiù tarde

pecchè faccio cchiù ore.

Aggio sta attiento ‘a via

e tu ‘e guagliune.

Tu stuie a sentì 'e mamme

e io ‘e patrune

ca ‘e ccose ‘e fanno

sempe a mmodo lloro

e chi ‘a vò a coppa

e chi a mazze

ognuno c’’a ragione

ca vò isso

e io c’’o piripisso

sempe ‘ncapo.

Ma ‘un me lamento,

‘a vita me piace

fino a che si capace

‘e vulerme bbene.

Ma ‘e vvote veco ca

nun te cunviene.

Ormaie simme spusate

‘un saccio ‘a quanno

ca ‘e cunte nun ’e faccio

tutt’’e juorne

si no me piglio scuorno

e po’ m’agghiaccio.

‘A vita nun è maie

sempe felice

e chi t’’o dice

te dice ‘nfamità,

ca io te voglio bbene

‘o saie ‘a quanno

stevemo ‘a scola assieme,

ma sempe pazzianno,

sempe redenno

pure si nun so’

nu pataterno

tutt’’e juorne.

Te stongo attuorno

e te cucculejo,

te porto nu penziero,

po’ te ne porto n’ato

ma stongo stanco 

pur’io qualche sera

Tu invece ’a vire nera,

te respiere.

Io nun ce credo

ca tu ‘o faie apposta

ma cu sta capa tosta

ca te truove

me pare sempe aiere

e no dimane.

Fa chello ca vuò tu

a me che ‘mporta

però te lasci’ ‘a sporta

cu chello ca m’e dato,

nun m’’a porto.

Gioacchino Ruocco

14.11.018   Ostia Lido