Cchiù tarde se fa…

Cchiù tarde se fa…

Cchiù tarde se fa

cchiù nisciuno te penza.

Ognuno corre

appriesso ‘e fatte proprie

e chi t’espropria

nun se ne fotte

‘e chello ca succede

a me, a te

e ‘a tanta ggente

ca resta senza niente

e ‘a carità

è ll’unica ca resta.

Ma chi s’’o leva a vocca

nun sempe sta deritto.

‘E solde pe l’affitto,

tanto pe chesto,

tanto pe chell’ato

ca ‘o mestiere ‘e pate

ogge è n’arte ‘nfame.

Sparte nu piezzo ‘e pane

e resteno mulliche

o p’’e picciune

o p’’e furmiche

e pe ll’amice maie

Ll’amice

si Ddio ‘e benedice

nun ‘e vide

e si ‘n ‘e benedice

te truove tutt’’e juorne

attuorno attuorno,

mò cu na scusa

e mò cu n’ata

e cu na faccia tosta

c’ormaie me so’ stangato

d’’e vedè

ca fanno a pua a pua

ma stanno meglio ‘e me

c’ormaie me magne ‘e guvete

e ‘a frutta ancora acevera

c’aggio appena coveta

p’’a mette a maturà.

Dice c’adda passà

stu maletiempo ‘e terra,

ma m’arricorda ‘a guerra

ca pure na furmica

sembrava  carne ‘a cocere

senza na schiaruta

p’’o dimane.

‘E mmane comme a ddoje palate

vacante e ‘o furno

senza fuoco.

LL’urdema fascina

se n’è ghiuta

a cchiù ‘e nu juorno

‘nfummo pe na pizzella

c’’a piccerella

me chiagneva  a juorne

e nun me metto scuorno

ca me stracciasse ‘o core

e l’arrustesso

pe fa fesso ‘a famme.

Ogge me pare ‘o stesso,

comme ‘ntiempo ‘e guerra.

Chi tene ‘nchiura ‘a porta

e ‘un te risponne

pure si ‘o cielo ‘nfonne

‘a tutte quante.

‘E sante, ma qua’ sante ?

grazie nun ne fanno.

Sultanto ‘e voccapierte

se troveno ‘canna

nu muscone o nu maravizzo

ch’è arrevato ‘mpizzo sulo a isso.

Gioacchino Ruocco

02.11.018    Ostia Lido