Na jurnata ‘e paura

Na jurnata ‘e paura

Quann’’o tiempo s’allumma

e mette ‘ncielo nuvele nere

nun se po’ restà allere

manco restanno ‘o cchiuso.

Acale na serranda,

e po n’acala n’ata,

‘e nu juorno addeventa na nuttata.

Te truove chiuso dinto

comme si fosse vierno.

Si tiene panne ‘a stennere

è a ‘spettà dimane.

Si no luntano

tu valle cerca

ca ‘o viento se n’’e porte.

ù

E tiene chiusa ‘a porta

comme si fore

fosse arrevata ‘a guerra.

‘O ssaie meglio ‘e me

stanno ‘nmiez’’a terra

ca doppo na tempesta

truove pe terra ‘o mmeglio

ca steve ‘ncopp’’e ramme.

Truove abbruciate ‘e rrose

da ‘o friddo sciso

‘a copp’a sti muntagne,

‘e lavarune c’hanno apparate ‘e surche

comme si ‘e turche

fossero turnate.

E quanta grazzia ‘e Ddio

ca Ddio ce ha levato.

Anema mia, che porte cchiù ‘o mercato ?

‘O chiante ‘int’’e fiasche

o nu ricordo ‘e Pasca ?

Sott’a putrella

pe grazie c’è rimasto

nu piennelo c’avasta

p’’o ppane e pummarola

e ‘a ‘ntrite pe rusecalle nucelle

sta vernata.

Gioacchino Ruocco

01.11.018  Ostia Lido