Castiellammare è nu lenzulo stiso

Castiellammare è nu lenzulo stiso

sempe c’’o sole mpiso tutt’’e juorno.

Nun è bandiera janca 'e chi s'arrenne

o 'o culore 'e chille ca so' 'mpise

e si qualcuno 'o penza s'è sbagliato,

se stesse a casa soja bello accucciato.

Castiellammare ormaie s'è stancata

'e tanta nfame ca vonno cummannà,

ca stanno riducenno stu paese

senza cchiù na lira pe fa spesà

e a 'a carità niscuno t''a fa cchiù.

Me fanno specie quanno fanno 'e belle

e aesceno d''a casa cu 'e vunnelle

accattate c''o sanghe 'e tutte ll'ate,

guagliune c'hanno perze 'a via d''a casa

e ccase ca so' chiene 'e 'nfamità.

T'arrobbeno, t'accideno

e na resata t''a fanno parià.

I' me ne jette ormaie tant'anne fa

e me fa ancora specie stu paese

ca invece 'e se fa gruosse

cu 'e bbone intenzione

s'è rusecate 'a carne e ppure ll'osse

'e tanta bbona ggente

ca indifferente campano

penzanno a chi sa chè

a quanno 'o rre

faceva na lemmosena

p''e fa sentì 'mpurtante

senza vulè offennere

'e muorte e a qualche sante

c'avesse fa 'o miraculo però.

E' overo so' scucciante,

nun è ca songo bbuono

si 'e bbuone se ne vanno.

Pe lloro simmo 'o vanto,

ce fanno pure 'a statua

pe nun sentirse ntuorto

ma sulamente quanno

nuie simmo finalmente muorte.

E intanto se ne fotteno,

arraffeno e si va stuorto

scumparano d''e chiazze

e nuie ca ne parlammo

addeventammo pazze.

Gioacchino Ruocco

Ostia Lido       10/09/2015

Inserita nella raccolta “Ce steva na vota…”