Tu m’è pigliato a uocchie …

Tu m’è pigliato a uocchie  già ‘a nu poco

e attuorno appicce fuoco e me secute

ca io nun saccio cchiù c’aggia penzà.

Si se sturzella ‘o raggio dint’’a rota

chesta nun gira comme avesse a fà

e penzo ca si stata proprio tu

ca staje passanno spisso a chesta parte

senza sapè che parte e arte faje.

Si tu me vuò parla ca tiene ‘a dicere,

famme nu segno, chiammeme na vota

invece ‘e sturzellarme cchiù ‘e na rota

ca si n’aggio bisogno comme faccio ?

Miettece ‘a faccia e io ce metto ‘o core,

ormaie simme ddoje perzone fatte.

Fernimmela  cu chesti  bavattelle

si no non ghiammo a nnanze cu sta vita.

Si m’è pigliato a uocchie che vuò ‘a me?

Me metto fora a loggia a piglià sciato

ma no pe te vedè, p’’e fatte mie,

quanno nun stò cujeto  o in sofferenza.

Penzo ca pure a te succedarrà

na vota ogne tanto, mica sempe.

ca vutte ‘e ccose all’aria e po te piente.

Ma si ‘e vvote io te tengo mente

e pe nun riturnà ncopp’a sti passe

ca già m’hanno purtanto ‘o malamente.

Te sto a guardà indifferentemente

comme a chell’ate ca io tengo arrasse.

Gioacchino Ruocco

Ostia Lido                    2015/09/25