Ormaie

Ormaie me ‘nzierre ‘a porta e me ne cacce.

Cadene ‘e bracce e nun tengo ‘a forza

manco ‘e nu passo nnanze.

I’ che delure ‘e panza appena juorno!

Chi m’ha purtata sta jurnata amara ?

Te guardo e dint’a ll’uocchio sta ‘o veleno

ca te mantene viva pe m’accide.

Nun vide cchiù, ma pienze sulamente

a fa ‘e fatte tuie futtennete

d’’a ggente ca sta attuorno

senza chell’ombra ‘e scuorno

ca primma te faceva

na femmena aggrazziata.

Passene ‘e ghiurnate

comme a tempeste ‘e viento

ca pure ‘e prete va sceppanno ‘a terra.

Ormaie è na guerra

l’ammore ca ce teneva vive

cu uocchie ca parive

na perzeca ammatura, carmusina

ca ogne mmuorzo nun c’era allappatura.

Jurnata amara ca scogna ‘e purtualle

e ‘o ualle muchio ca nun parla ‘e niente

Pur’isso s’annasconne quanno ‘o viento

spezza sti ramme e porta nu turmiento

ca nun se sape quanno fernarrà.

Gioacchino Ruocco

Inserita nella raccolta "'O mese 'e settembre"

Ostia Lido         2015/09/02