Cu 'e mane mane

Penziere

Te veco afflitta

e tutta penzarosa,

cu ‘e mane mane

e ‘o core

ca nun s’arreposa,

ca nun trova pace,

ca ll’ati vote

t’accunciava ‘a vesta

stennenne ‘ e chieje

ca tiene ‘ncopp’’e gamme.

Si ‘o tiempo ogge

avesse perzo ‘a voce

ce penza ‘a faccia toja

a mette ‘ncroce

tutto ‘o turmiento

ca te coce dinto.

Na refulella ‘e viento

nun sarria male.

Bastasse nu mumento

pe dà nu sguardo attuorno.

Ma nun è scuorno

chello ca tu cunto,

è sufferenza

ca nun trova ‘o spunto

pe jettà a ll’aria

‘o munno ca stà attuorno.

Quanno te lievo ‘a lloco

é n’atu juorno.

Sicuramente

cagnarrà qualcosa.

Gioacchino Ruocco

22.02.017  Ostia Lido