Vaco ‘e pressa

Documento rintracciato sul "Libero Ricercatore"

Vaco ‘e pressa

Sotto ‘o lampione,

addò Fonzo ‘o pazzo,

screveva ‘o giurnale  “Vaco ‘e pressa”

ce so’ passato

ma ‘un ce sta nisciuno

ca m’ha pututo dicere addò stà.

Uno sultanto

ca me guardava strano

dicette:

-Si tu ‘o vuò sapè, na sicaretta

te po’ custà,

na paglia

ca quanno ‘o ciuccio arraglia

almeno tengo a che le dà

e io nu sciuscio ‘e fummo

nu poco pe sbarià.

Ma fusseve …?

Guagliò,

si m’accummience a fà tanta dumande,

nun saie a che paese io te manno:

‘O tiempo ‘e Peppe

quanno steva arbanno

chesta nazione nova

c’ancora nun  fa ll’uovo c’hadda fà !

C’’o vaje cercanno a fà ?

Ormaie Fonzo è muorto.

Qualcosa pure a isso jette stuorto

ca se fumava sule macedonia.

‘A storia è storia,

pirciò ‘a vita mia

l’aggia campata jenne sempe ‘e pressa.

Chello c’aggio lassate, si te ‘nteressa,

st’addò s’astipano ‘e giurnale.

Io ca “vaco ‘e pressa”  ancora,

me fumo ‘a sicarretta e te saluto.

Guagliò, cagne tabbacco

ca che sto nun è bbuono

T’hanno ‘mbrugliato,

è robba ‘e contarbbando.

Allappa ‘a vocca!

Gioacchino Ruocco

Ostia Lido           12.33    

02.02.017           Ostia lido