Quanno stu cielo è triste

Quanno stu cielo è triste

nun me fa friste a là.

Nun so’ nu cammurrista

comme staie a penzà.

Te voglio bene

e ‘o sanghe dint’’e vene

me frije comme  a te

quanno t’attacche a me

e me vuò stà vicino.

E vote songo ‘a capa

e tu ‘o cuscino

o tutto ‘o cuntrario

quanno a  ‘o calannario

è ‘o mese ‘e marzo.

A aprile cagneno ‘e cose.

‘O core s’arreposa

pe n’attimo sultanto

ca quanno ‘a maggio ‘e rose

prufemeno ‘e ciardine

e cu ‘e cerase

è ogne ghiuorno festa.

Chello ca resta ‘e nuie

ce ‘o gudimmo

quanno ‘e ghiurnate longhe,

quanno’o core ca me sbatte

se va appuggianno

nu poco a tutto parte

comme a nu furastiero

can un vò sta in disparte.

Tutta a tristezza mia

a chi ‘a racconto ?

Ma nun te voglio bene

sulo pe chesto.

Quanno te chiammo

e tu nun me rispunne

m’appenno appiso ‘o rammo

cchiù vicino

comme a nu mandarino

prufumato e no ‘e acquazzo.

Te voglio bene tanto

e faccio ‘o pazzo

pecchè a sta luntano

pare ‘e te perde

comme a quanno ‘e foglie verde

se fanno gialle

comme a nu purtuallo.

Gioacchino Ruocco

03.02.017              Ostia Lido