E tu a chi pienze…

E tu a chi pienze quanno rieste sola ?

‘O ciuccio ca vola o a mamma toja ?

‘A fava ca se coce o a chi s’’a magna?

A chi se spenne ‘e solde e ‘n ‘e guaragna

e miette ‘a parte pe quanno ‘a carestia

nun tene niente a dà e mmiez’’a via

ce sta ggente ca chiagne e se dispera ?

Ognuno penza chello ca vò penzà.

T’’o sto chiedenno justo pe raggiunà.

I quanno se fa sera more ‘e suonne

ca si m’appogge songo già fernuto.

Sarrà ca campo senza nu turmiento,

ca dongo all’ate pure si ‘n ‘o tengo.

Chi se fa santo campo scunzulato.

Guardemo dint’a ll’uocchie, tiene mente

E dimme che ce vide dint’a lloro ?

Chi campa comme a me,  mmiezo a sta ggente

vale cchiù ‘e ciente na parola bbona,

na parola ‘e pazzia ca regna ‘o core

e na resata ca nun te fa maie male

e ce spartimmo pane e pummarola.

Si nun ‘o tengo ce jucammo ‘o core

O isso a me o io ‘o dongo a isso,

a chi è cchiù fesso tanto perdo sempe

e ‘a ggente me vò bbene e degne ‘e mmane

strignenneme sti mane mmano a lloro

addo ‘o sango scorre pure si s’o toste

pecchè ‘e sacrificie ‘e fanno apposto.

I’ penzo tutte ‘e ssere a na perzona

speranno c’’o bbene ca le voglio

le scete ‘o core e se ne vene appriesso.

Senza nteresse e na parola bbona

pe nu surriso, pe nun penziero amaro

che ‘e vvote me fa chiagnere annascuso

ca nun so’ cchiù guaglione e ne scuso.

I’ penzo ca sta fava nun se coce

si ‘a miezo juorno nun s’è cotta ancora.

Si pure è nu vapore ca  cammina

a duciente anno e 0o ffuoco è muscio.

Io me ne stongo mucio, senza cchiù parola,

Te guardo e aspetto pe vedè che faie

primmo ca cumbine qualche guaio.

Gioacchino Ruocco

Ostia Lido             2015/09/01