Papà me purtava…

Papà me purtava ‘o be’ bello.

‘E vvote erano caramelle,

‘e vvote na carezza sultanto,

‘e vvote  na guardata c’’o chianto

pe nun puté starme vicino

sera e matino comme vuleva.

‘A fatica cu ‘e turne ‘o stancava

ma quanno turnava

cchiù stanco c’allero

me guardava e spereva

guardanneme ll’uocchie

cchiù viecchie ‘e n’ata jurnata.

I currevo pe isso e isso pe me

ca vuleva sapè a che juoco jucavo.

‘O guardavo speruto  e chiù gruosso,

Quanno ‘e vvote ‘o purtavo ‘a mangià,

m’accurgette quanto surava

e ‘a vita ca isso faceva.

Stanco e strutto, ma sempe cchiù allero

quanno sunava ‘a chitarra ogne tanto.

L’avesseno fa tutte sante

‘a ggente ca campa e nun se lamenta,

c’’a casa ogne sera  tornanno e spereno

c’’a vita avesse cagnà.

Pe sta nzieme cu ‘e figlie,

pe se gudè ‘a famiglia, ‘e cchiù piccerille

‘e pariente, chi te vò bbene,

Chi pene nun tene  o  nun vò fà sapé.

Tanto si tiene o nun tiene

è ‘o core a sapè c’adda rà .

Gioacchino Ruocco

Inserita nella raccolta “Ce steva na votra…”

Ostia lido                  2015/11/23  h 7,30