‘A notte è stata fredda...

‘A notte è stata fredda,

ma ‘e stelle ‘ncielo doce.

Pareva ‘e sentì a voce

‘’e ll’aneme luntane,

ca forse songo overe

e no nun cunto ‘nfame.

Appena ca m’affaccio

m’acchiappa ‘o friddo ‘ncuollo

e ‘o core se fa muollo

penzanno e suspiranno.

Ormaie passato è n’anno

ca me morzeco ‘e mane.

Dicette ‘o parrucchiano

chello ca dice sempe

ca nuie turnammo a dio

c’’o buono e ‘o malamente.

Overamente dicette n’ata cosa

ca l’anema riposa

per il giudizio eterno.

Si fosse overo, soffro

pe meliarde ‘e anne

‘a quanne te lassaie

ca già songo tant’anne.

Qunt’anne ancora allora

aggio male patì

si d’’o buon tiempo l’ora

sta prossemo a venì ? *

Comm’è sta vita eterna?

Comm’è stu pataterno ?

Cchiù ‘nfame ‘e tanta gente?

O è nu piezzo ‘e pane

ca trova nu rimedio

cu nu felillo d’uoglio

‘e miez’a terra nosta

ca pare oro a splennere

e t’’a fa meno tosta ?

Voglio penzà ca tu

quanno me perdunaste

‘o male mio fernette

quanno io te jette a chiagnere

‘o capo e ‘a piglià sciato.

E’ overo ca me veneno

penziere ca ate ‘un fanno,

ma io te veco ‘e correre

comme ‘a stella cumeta

appesa ‘int’’o presepio

‘a notte dint’’o cielo.

Chi sa quanno fernesce

tutta sta jaucuvella ?

‘Ncopp’a qua stella vaie ?

Addò te staie perdenno ?

Chi sa si stu penziero

t’arriva?  Io ‘o sto screvenno

cu tutt’’o sentimento

ca si nu juorno ‘e chisto

ce avessemo ‘ncuntrà,

guardannemo ‘int’a ll’uocchie

me piglie dint’’e braccia

ca già sento ‘a carezza

ca tu m’appuoie ‘nfaccia.

‘E vote torno ‘o Capo

cu ll’anema cchiù doce

e pare c a te trovo

ancora affianco a me

e na speranza forte

ancora ‘e te vedè.

Gioacchino Ruocco

Ostia Lido          

11.01.017

*